श्रीवादिभीकरस्वामिप्रपत्तिः

श्रीवादिभीकरस्वामिप्रपत्तिः

श्रीरम्यवरयोगीन्द्रश्रीपादाब्जमधुव्रतम् । 

श्रीवादिभयकृत्सूनुं श्रीनिवासगुरुं भजे ॥

श्रीरङ्गहस्तिगिरिवेङ्कटभूधरादि-

दिव्यस्थलेशविषयान् कृतवान्प्रपत्तिः । 

यो वादिभीकरगुरुः प्रथमानकीर्तिः 

तस्यैव दिव्यचरणौ शरणं प्रपद्ये ॥ १ ॥

श्रीमच्छ्ठारिमुखपूर्वगुरुप्रणीत-

सद्-द्राविडोक्तिविततीषु कृतान्तरङ्ग । 

वादीन्द्रभीकरगुरो महनीयशील

शोभायमानचरणौ शरणं प्रपद्ये ॥२॥

श्रीरम्ययोगिपदपद्ममरन्दपान-

संवृद्धबोध समलंकृतचञ्चरीक । 

वादीन्द्रभीतिकरसंक्षितपोषणैक-

जाग्रत्त्वदीयचरणौ शरणं प्रपद्ये ॥३॥

अद्वैतवादिपदवारणकुम्भडम्म-

संभेदने दृढपराक्रम पञ्चवक्त्र। 

वादीन्द्रभीकर गुरो मदनुग्रहाय 

प्राप्तौ त्वदीयचरणौ शरणं प्रपद्ये ॥४॥

रामानुजार्यवरभाष्यपुराणसूक्ति-

गम्भीरभावविशदीकरणप्रवीण ।

वादीन्द्रभीकरगुरो प्रथितप्रभाव 

भक्त्या त्वदीयचरणौ शरणं प्रपद्ये ॥५॥

का पूर्व इत्यभिहितं वचनं निशम्य 

काञ्चीपुरी न इति चोत्तरमुक्तवान् य

तस्यैव वादिभयकृद्-गुरुपुङ्गवस्य 

तादृक्प्रभावचरणौ शरणं प्रपद्ये ॥ ६

रामानुजार्यमुनियामुनराममिश्र-

पद्माक्षनाथमुनिसूरिपदाम्बुजेषु । 

भक्तिं दृढां रचयतः प्रतिवादिभीकृ-

दार्यस्य दिव्यचरणौ शरणं प्रपद्ये ॥ ७ ॥

पाषण्डषण्डवनदाहदवायमान 

वेदान्तदेशिककृपापरिलब्धबोध । 

वादीन्द्रभीकरगुरो मम वाञ्छितार्थ 

लाभायमानचरणौ शरणं प्रपद्ये ॥८॥

वेदान्ततर्ककवितादिविचित्रतन्त्र 

नानार्थतत्त्वपरिशीलनजागरूक । 

वादीन्द्रभीकरगुरो मम भागधेय 

विच्छेदकारिचरणौ शरणं प्रपद्ये ॥९॥

आषाढमासि गुरुपुष्यदिनेऽवतीर्ण 

सौशिल्यशान्तिकरुणादिगुणामृताब्धे 

वादीन्द्रभीकरगुरो मम भागधेय स्वामि-

स्त्वदीयचरणौ शरणं प्रपद्ये ॥१०॥

श्री श्रीनिवासहृदयाब्जविकासमित्र 

श्रीवत्सवंशवरभूषण सच्चरित्र । 

वादीन्द्रभीतिकरवर्य भवत्कृपायाः 

पात्रं कुरुष्व भगवन् शरणागतं माम् ॥ ११ ॥

 ॥ इति श्रीवादिभीकरस्वामिप्रपत्तिः ॥